اليوم مشوارنا لح يكون مهضوم وحلو، لح نحمل حالنا وننزل صوب الجنوب وتحديدًا على صيدا، عاصمة الجنوب. صيدا هي تالت اكبر مدينة بلبنان بعد بيروت وطرابلس، كما انها من اقدم المدن يلي اسسها الكنعانيين. صيدا كمان مشهورة بلقبها التلي "ام الفقير"، فهي بتستقطب السكان من وين ما كانوا وبيقصدوها لعدة غايات.
طيب تعوا نشوف كيف فينا نقضي النهار وننبسط بهالمدينة الحلوة:
١- ترويقة كنافة او فول ولا أطيب
ببداية المشوار ما فيكن توصلوا على صيدا بلا ما تتروقوا أطيب كعكة كنافة بلبنان، فمدينة صيدا بتتميز بعدد كبير من محلات الحلو لي بيقدموا هالترويقة اللبنانية الطيبة.
٢- وكمان فيكن تتروقوا اطيب اكلة فول وفتة بواحد من المطاعم الكتيرة الموجودة وأشهرها مطعم البابا.
٣- زيارة قلعة صيدا
هلق بعد ما خلصنا ترويقتنا صار فينا نبلش نبرم بمدينة صيدا والبداية بتكون من القلعة التاريخية يلي فاتحة بوابها للزوار كل أيام الأسبوع وبدخولية جدًا رمزية وهي بس 4000 ليرة لبنانية بس.
٤- رحلة بالقارب
للأشخاص يلي بيحبوا البحر فيكن تعملوا جولة بالقارب قريب من القلعة التاريخية وتعيشوا تجربة ولا أحلى من هيك
٥- جولة بالسوق القديم
مدينة صيدا مليانة بالمناظر الحلوة ويلي بترجعنا بالزمن لأيام كتير حلوة لأنها بعدها محافظة على رونقها التراثي والتاريخي، ومن أهم المعالم يلي بيفرجونا هالشي هو السوق القديم بناسه الطيبة والمليان بالحرف اليدوية العتيقة. جولة لح تذكرنا بأيام جدودنا!
٦- خان الصابون
فيكن كمان تزوروا خان الصابون الموجود بهالمدينة، مكان تراثي بامتياز وبيحتوي على انواع كتيرة من الصابون المصنوع يدويًا. جولة مليانة مناظر وروايح حلوة!
٧- زيارة قصر دبانة
كمان فيكن تزوروا قصر دبانة العثماني يلي انبنى بالعام 1721 ولي هو من أهم المعالم التراثية بلبنان وبتعيشوا في أجواء كتير حلوة.
٨- هلق صار وقت الغدا
قبل ما نكمل جولتنا بهالمدينة لازم نوقف نتغدا، وهون قدامكن عدة خيارات فيكن تتغدوا اطيب ساندويش فلافل عند ابو رامي مثلا او تروحوا على سوق الأكل محل ما في كتير خيارات وتنقوا عذوكن.
٩- كزدورة على الكورنيش
وما فينا نخلص مشوار صيدا بلا ما نمرق على الكورنيش نتمشى ونريح شوي وناكل درة مشوي وفول. ونحنا ورايحين فينا ناخد معنا اطيب اكلة سمك طازة من المينا.
Comments
Post a Comment