أكيد ما نسينا نخبركن عن المطاعم يلي فيكن تزوروها حد الغابة!

​

اليوم رح نحكي عن التنوع البيئي الموجود بلبنان وتحديداً عن الغابات الموجودة ببلدنا، ونكتشف جمال هل مواقع الخضرا المميزة ونعيش لحظات فرح وهدوء وتأمل بأحضان الطبيعة.

جاهزين؟ يلا نبلش مشوارنا!

١. غابة الأرز، حدث الجبة

بس نحكي عن غابة الأرز، بتجي ع راسنا بالعادي غابة الأرز ببشري بس اليوم رح نعرفكن على كنز مخفي بقضاء بشري، غابة حدث الجبة. تعتبر هل غابة من أجمل غابات لبنان والشرق الأوسط وبتتألف من عدة أنواع شجر، قد ما كتار بقولوا ولاد الضيعة الكبار بالعمر إنو بالزمانات ما كانت تقدر الشمس تخرقهن، ومن أهم الشجر الموجودين بهل غابة، الأرز واللزاب والصنوبر والعفص والقطلب والغار والحور والسنديان والمحلب. فيكن تتأملوا جمال هل غابة أو تاخدوا أجمل الصور من بعيد أو تتمشوا بربوعها.

وين فينا ناكل بحدث الجبة؟

مطعم الحورة

الرقم: 622 184 76

مطعم ديوان الرومي

الرقم: 853 942 71

٢. غابة بولونيا، بولونيا-المتن

تعتبر غابة بولونيا من أجمل غابات لبنان، بس توصلوا عليها رح تحسوا حالكن برات لبنان بسبب الخضار الناصع وجمال الأشجار الشامخة والهدوء لي بتتمتع في هاي الضيعة. إذا بعد ما عشتوا هل إختبار، صار لازم تروحوا تكتشفوا بولونيا وطبيعتها المميزة لي رح تمنحكن سلام داخلي.

وين فينا ناكل ببولونيا؟

مطعم المشاوي

الرقم: 200 913 04

٣. غابة بكاسين، جزين

تعتبر غابة بكاسين من أجمل غابات لبنان والعالم وبتتميز بسحر ما فينا نقاوموا، رح تشوفوا شجر الصنوبر الكثيف مصفوف على شكل لوحة فنية ساحرة. بهل ضيعة فيكن كمان تركبوا الدراجات وتمارسوا هل الرياضة المميزة وغيرها بمجمع "بيت الغابة" للسياحة البيئية والأكل الموجود بقلب الغابة.

وين فينا ناكل ببكاسين؟

مطعم بيت الغابة أو La Maison de la Forêt

الرقم: 222 800 07

٤. غابة أرز جاج، جرود جبيل

تعتبر غابة أرز جاج من أقدم المحميات الطبيعية بلبنان وبتقول الأسطورة إنو المصاروي أخدوا خشب أرز من أرز جاج ليبنوا إهم معابدن ومقابرن العظيمة. وهل غابة هيي فعلاً عظيمة بجمالها ونوعها البيئي، بس توصلوا فيكن تتمشوا فيها وتكتشفوا جميع المسارات الموجودين بقلبها من الصعب وصولاً للأهين أو تعملوا بيكنيك بربوعها.

وين فينا ناكل بجاج؟ 

مطعم: سما جاج 

الرقم: 223 540 70

٥.غابة العزر، فنيدق-عكار

قد ما نحكي عن سحر هل غابة ما فينا نعطيها حقها، بقولوا كتير حلو نروح نزورها بفصل الخريف لأن وراقها بيحزنوا كمان وبيلبسوا لون الأرص. تعتبر هل غابة المحل المثالي للتواصل مع الطبيعة والهدوء والتأمل وهيي المقصد الأمثل لمحبي شجر الصنوبر والمغامرات البيئية ولكل حدا جايي عبالو يعيش شوية وقت مع الطبيعة، أو يعمل هواية المشي والتخييم.

وين فينا ناكل بفنيدق؟ 

مطعم هيكل الشنبوق، القبيات 

الرقم: 650 329 03

٦. غابة الأرز، الباروك-الشوف

تعتبر محمية أرز الشوف الطبيعية محل مثالي لتأمل جمال لبنان بيقصدوا محبي المغامرات والطبيعة للمارسة رياضة التسلق والتعربش والمشي ومشاهدة الطيور ومغيب الشمس وركوب البيسيكلات والمشي على التلج. 

وين فينا ناكل بس نكون بالباروك؟ 

مطعم بيتنا 

الرقم: 456 841 03

مطعم سيدو هاوس كافي Cedar House Cafe

الرقم: 162 447 03