جولة على أجمل بيوت الضيافة بلبنان!

​

صارت بيوت الضيافة بلبنان جزء مهم من السياحة بفضل تصيمها الجذاب، المسابح الساحرة، الفيو الخيالي وأرقى خدمة وهيي المحل المثالي للاستمتاع بعطلة بربوع لبنان، وإذا كنتو ما بتحبوا النزلة بالأوتيل، وعبالكن تقعدوا بمحل يحسسكن بالرواق والراحة كأنكن بالبيت، شوفوا هل بيوت الضيافة الرائعين لي رح يأمنولكن نومة من العمر مع خدمات مميزة وبيسين ساحر.

١. بيوت غلبون، غلبون-جبيل

هل بيت موجود بضيعة غلبون وبيتمتع بمنظر بطير العقل، وهوي مكان مميز للنومة والترويقة. هل البيت التقليدي بيتميز بحيطان حجر والسقف العالي وقعدة الجبلية الأصيلة، وببتوفر في كل واسايل الراحة ليستقبل الزوار على مدار السنة. رح ياخدكن التراس على عالم تاني مطرح ما فيكن تاكلوا وتشربوا بالهوا الطلق وتشوفوا مغيب الشمس وتسرحوا بأفكاركن. كل شي بهل بيت مميز وبيشبه الحلم بس يمكن أكتر شي رح يسحركن المسبح، يلي بيشبه بحيرة ساحرة بشي قصر قديم، بيتمتع بقعدة مهضومة ومقاعد مميزة. بيتألف هل بيت من بيت البيدر وبيت الضيعة، بتحمل كل أوضة طابع مختلف وبتتميز بديكور غير شكل. وكمان فيكن تجربوا منتجات من الضيعة والمونة البلدية. 

للحجز، اتصلوا على: 756 532 03

٢. بيت البترون، البترون

بيت البترون عبارة عن بيت ضيافة تقليدي موجود بقلب البترون، محاط بالشجر وبطل على البحر. الديكور بهل محل بسيط وجبلي، بيتميز بيت البترون بطاولة سفرة خشب مزينة ورود وشموع وأوض نوم مكنكنة ودافية رح يذكروكن ببيت التيتا العتيق. في إنترنت بكل البيت والأكل بلدي جبلي محضر من الجنينة والمنظر بياخد العقل ومطل على البحر. وكمان فيكن تروحوا تتمشوا بالمرج وتستمتعوا بالقعدة برا وبرواق الطبيعة. ما نسينا نخبركن عن المسبح الساحر لي بتحلى القعدة في بالليل بعد ما تغيب الشمس مع البرودات الحلوين. 

للحجز، اتصلوا على: 049 270 03

٣. فيلا جوا ، فتري-جبيل

فيلا جوا Villa Joie عبارة عن بيت ضيافة موجود بمنطقة فتري بجبيل، محاط بالشجر والورود والزيتون من كل الميلات وبيكشف على أجمل المناظر الطبيعية. بتتميز فيلا جوا Villa Joie بوجود 9 فيلات بربوعها كل وحدة أحلى من التانية، بتحمل أسامي الشجر والورود الموجودين فيها وجرعة من السعادة. كل فيلا عندها هويتها الخاصة وبتفوح منها ريحة الورد والشجر. وكل فيلا حجمها شي، في من كل الأحجام، بتستقبل من الشخصين وصولاً ل8 أشخاص وكل حدا رح يجي على هل فيلات رح يطلعلوا جرعة كبيرة من السعادة. بعض هل الفيلات بيتميز بالجنينة الخاصة والبعض بالبيسين الخاص، بالإضافة للمسبح الموحد لي الكل في يتشارك في لحظات السعادة.

للحجز، اتصلوا على: 950 009 76

٤. فيلا شمعون، حصرون

فيلا شمعون عبارة عن بيت حجر قديم محاط بالأشجار، وتم تجديده من خلال دمج عناصر معمارية عصرية مع الحيطان الملونة، الشبابيك والبواب الأزاز واللوحات الفنية المعبرة. بقلب فيلا شمعون بار ومطعم ساحر بقدموا أفخر الأطباق والمشروبات والزينة لي بتاخد العقل. فيكن كمان تشاركوا بنشاطات ثقافية متنوعة بحصرون لي رح ترجعكن لإيام الماضي الجميل متل زيارة متحف جبران، وصناعة الكبة بالجرن وعمل المونة وغيرها من العادات والتقاليد الجبلية لي بعدها موجودة بهل ضيعة. هل بيت بيتمتع كمان ببيسين ساحر الجمال رح يمنحكن الراحة لي عم تنبشوا عليها.

للحجز، اتصلوا على: 205 508 70

٥. بكرزاي، بعقلين-الشوف

بكرزاي عبارة عن بيت ضيافة موجود بأحضان الشوف، بيتميز بقعدة ساحرة بقلب الطبيعة ومنظر بياخد العقل. عبالكن تجربوا الترويقة على المسبح؟ البيسين الساحر بيكشف على أجمل المناظر الطبيعية وصوت الطبيعة والرواق رح يخلوكن تسرحوا بأفكاركن وتنسوا الهموم. لمحبي الحيونات، بكرزاي كمان عندن مزرعة زغيرة فيكون تشوفوها. خضار بياخد العقل! وإذا بتحبوا وبتقدروا فن صناعة الفخار الأثري، فيكن تزوروا المعرض الموجود وما تنسوا تجربوا الأكل الطيب بالمطعم.

للحجز، اتصلوا على: 020 512 03

٦. تيراس عبدلي، البترون

هل بيت موجود على أعلى التلال بالبترون ، وهوي البيت الجبلي المثالي لمتضية وقت حلو مع أعز الناس على قلبكن. هل مشروع بيتألف من تلات بيوت تقليدية تم تجديدها بين ممرات خضرا وشجر، مفروشة بشكل حلو ومثالية لكل حدا عم بنبش على الرواق والراحة وشوية رومانسية. هل محل بيتميز كمان ببيسين جبلي بياخد العقل بيكشف على أجمل المناظر.

للحجز، اتصلوا على: 569 333 76

٧. بيوتي، معاصر بيت الدين-الشوف

بيوتي بيت ضيافة عائلي موجود بأحضان الشوف، بيتألف من ٨ بيوت محاطة ببيسين ومساحات خضرا هادية. شوفوا أول ما تفوتوا رح تفكروا حالكن ببيت الأحلام: الورد، الحجر، القناطر، القعدة الجبلية، النومة بالضيعة، الأكل الطيب، الديكور المميز، عطر الورد والحب. هالبيت وحيطانو بيحكو ألف قصة وقصة. ما إلكن غير تجوا وتعيشوا هل شعور وتنسوا كل شي وتشموا ريحة الورود وعطر الطبيعة. أما بالنسبة للمسبح، فالحكي بيعجز عن وصف جمال القعدة بالمي والمناظر الحلوة خاصةً وقت غياب الشمس. النومة بقلب الغرف المفتوحة على المناظر الطبيعية رح تخلي قلبكن يدق. هل بيت مجهز بكل شي لتعيشوا راحة نفسية وجو بياخد العقل!

للحجز، اتصلوا على: 200 726 03