اليوم رح ناخدكن جولة مميزة على أجمل الجواهر المخفية ببلدنا لنتعرف على مواقع جديدة فيكن تروحوا عليها وتاخدوا أجمل الصور وتعملوا أجمل الذكريات ونخبركن عن قصة كل محل.
جاهزين؟
١. جنة الأرز ، الأرز-بشري
رح نبلش جولتنا بالشمال بمطرح بتعجز الكلمات عن وصف جمالو وعظمتو، هل محل قاعد على كتف الوادي. بس تلقوا نظرة من الJetée رح تشوفوا الوادي المقدس على مد عينكن والنظر. فيكن تاخدوا أجمل الصور، تحسوا بالهوا عم بلعلع وتشوفوا أجمل منظر شايفينوا بحياتكن.
٢. معمل الحرير المهجور، كفرمتى
هلق رح نطلع صوب الشوف ونتعرف على قصة هل معمل يلي كان يربي أجيال ويعيش الضيعة كلها من صناعة وتجارة الحرير وتربية دودة القز، من حوالي ٦٠ سنة لورا وقفت هل صناعة كلياً بجبل لبنان وتحول هل معمل لشبه متحف راسي من حجر وصامد رغم الصعوبات.
٣. الحمامات الرومانية، وسط بيروت
هل كنز المخفي بالعاصمة مش الكل بيعرف عنو لأن في نقاط جذب تانية بالعاصمة بتخلينا نتوقف عندها، بس اليوم رح نمرق ونتوقف عند هل محل يلي بيتكون من حديقة ومجموعة من البقايا المكشوفة للحمامات الرومانية القديمة. فيكن تاخدوا أحلى الصور حد هل حمامات وتتذكروا التاريخ الحضاري لبيروت وترجعوا تكفوا جولتكن بالعاصمة.
٤. بيت الدين، بيت الدين-الشوف
عبالكن تعيشوا مغامرة مهضومة؟ مشوا معنا على قصر بيت الدين لبيتألف من عدد لا يعد ولا يحصى من الغرف. فيكن تجوا مع حبيبكن وتعيشوا هل مغامرة سوا، رح ضيعوا بين الأوض وكل ما تفوتوا على أوضة رح تشوفوا شي جديد. أكتر شي ملفت بالقصر، غرف الحمامات، كتير كبار وتصميمن فخم. وهيك فيكن تاخدوا أحلى الصور سوا وتعملوا ذكريات ما بتنتسى.
٥. بجرين، جبيل
بقولوا عن هل ضيعة، قرية الأشباح لأنها مهجورة من عشرات السنين وما بقى مين يخبر عن أهلها لي كلن هاجروا بالبحر وقت المجاعة. إذا عبالكن تعيشوا شي جديد، روحوا على هل ضيعة الحلوة وعيشوا مغامرة الإكتشاف وتفرجوا على البيوت المهجورة وكنيسة مار الياس الصامدة وخدوا أجمل الصور.
٦. بالوع بلعا، تنورين
هل بلدة بتتمتع بجمال طبيعي لا يوصف، وبتتميز بالخضار والمواقع الطبيعية والأثرية. بتمشوا على البالوع وبس توصلوا رح تحسوا بعظمة هل مكان. تخايلوا حالكن واقفين وتحتكن في بالوع ما بتعرفوا كيف بيخلص: متعة للنظر. ورح تسمعوا صوت المي والشلال النازل وتتأملوا جمال المكان.
٧. خان الفرنج، صيدا
على بعد مسافة قصيرة من قلعة البحر بيقعد هل محل، تم بناء خان الفرنج على إيد فخر الدين المعني التاني بأوائل القرن السابع عشر لتشجيع التجارة مع فرنسا وتأمين مكان واحد للتجار لبيع وشراء القطن والحرير. كان الطابق الأرضي عبارة عن سوق، بينما الطابق العلوي كان مخصص للتجار ليرتاحوا بس يتعبوا. هل محل المميز بالجنوب، رح ترجعوا في بالزمن لورا لتاخدوا أجمل الصور إنتو وعم تتأملوا التاريخ.
٨. مزار مار الياس، حدشيت
هلق رح نرجع نطلع صوب الشمال وتحديداً على ضيعة حدشيت لنكتشف جمال هل منطقة الساحرة ببلدنا ونتعرف على هل مزار المعلق بين السما والأرض. فيكن تطلعوا على قمة الجبل وتتصوروا على أعلى محل وتشوفوا إهدن وبشري والوادي المقدس من فوق.
٩. غابة العزر، فنيدق
هل غابة الساحرة موجودة بين ضيعة القبيات وفنيدق، بتتميز بشجر السنديان المعمر لي بيتغير بولونو بطريقة مميزة بين الفصول ليشكل لوحة فنية مرسومة.
Comments
Post a Comment