هل بيت "كامل مكمل" وجاهز يستقبلكن بس بدكن!

​

بما إنو نحنا بعز الصيفية، طالع على بالنا نروح على محل نروق راسنا ونشم هوا نضيف وننزل على البحر ونحس بلمسة الجبل.

بركة أسمات بيجمع كل هل صفات ببيت واحد!

رح نتعرف على هيدا البيت اليوم وناخدكن جولة مهضومة على هل محل المميز.

بركة أسمات بيت ضيافة تراثي جبلي مغطى بالزهور والخضار، بس تفوتوا رح تشوفوا جنينة مهضومة فيها فخار ومحدلة وتحسوا حالكن عنجد بالضيعة. 

الحلو بهل بيت إنو رح تحسوا حالكن بالضيعة وإنتو على البحر!

البيت بيتمتع بجنينة مهضومة كتير وقعدة جبلية على الأصول. تخايلوا حالكن قاعدين بهيك محل عم تقروا كتاب وتسمعوا موسيقى وتسرحوا بأفكاركن.

البيت من جوا مجهز بكل شي لترتاحوا نفسياً وجسدياً وتقضوا وقت حلو.

غرف النوم واسعة ومرتبة كتير والشبابيك بيشبهوا شبابيك بيت التيتا والجدو.

هلق رح نخبركن شوي عن الأسعار لتاخدوا فكرة: 

إذا عبالكن تقضوا ليلة وحدة بنص الجمعة فرح تكلفكن 120$ مع ترويقة

أما إذا عبالكن تقضوا ليلتين بنص الجمعة فرح تدفعوا 220$ مع ترويقة

هلق ليلي مار بيقدر بنص الجمعة، في يحجز بالويك-أند بس أكيد الأسعار بتختلف شوي وبتصير أغلى:

رح تدفعوا 150$ على الليلة الوحدة و270$ على الليلتين

كمان بهيدا البيت رح تحسوا حالكن بعالم تاني فعلًا لأنو موقعو كتير مميز فهو بالإضافة لإنو بقلب البترون، هوي كمان قريب من شط البحصة، وسوق البترون العتيق والقهاوي والمطاعم والمعارض لي بتصير فيها بالعادة المهرجانات بالمنطقة.

بعد في شي كتير مميز رح يفوت على قلبكن بهيدا البيت، مطعم بركة أسمات يلي هوي عبارة عن محل مهضوم ومكنكن بحضر أكلات وطبخات بيتوتية ولا أطيب من هيك متل الكعك، التوست مع لبنة، الشاورما الvegan، الفاهيتا والبيتزا، البوظة والعصير وقصص غير كتير طيبين.

على فكرة، فيكن تروحوا على المطعم ساعة لي بدكن وتستمتعوا بجو الضيعة وأكل البيت من دون ما تكونوا حاجزين ببيت الضيافة.

هل بيت فيكن تعملوا في كمان جلسة تصوير للعرس أو تتجوزوا وتعملوا حفلة زغيرة أو تقضوا شهر العسل مع حبيبكن بأجواء رايقة وتستمتعوا بالبحر.

هل بيت "كامل مكمل" وجاهز يستقبلكن بس بدكن!

للحجز، اتصلوا على: 976 925 70